ஜப்பான் விண்வெளி ஆய்வு நிறுவனம் (ஜாக்சா), செவ்வாய் கிரகத்தின் நிலவுகளை ஆய்வு செய்யும் MMX விண்கலத்தை செவ்வாய்க்கிழமை விடியற்காலையில் தனேகஷிமா தீவிலிருந்து ஏவியதாக அசோசியேட்டட் பிரஸ் (AP) தெரிவித்துள்ளது. ராக்கெட்டின் மேல் நிலையிலிருந்து விண்கலம் திட்டமிட்டபடி பிரிந்ததும், சுமார் ஒரு மணி நேரத்தில் ஏவுதல் வெற்றி என அதிகாரிகள் அறிவித்தனர்.
ஐந்து ஆண்டுகள் நீடிக்கும், 578 மில்லியன் டாலர் மதிப்பிலான இத்திட்டத்தில் ஐந்து விண்வெளி நிறுவனங்கள் இணைந்துள்ளன. சுமார் 5 டன் எடையுள்ள விண்கலம் அடுத்த ஆண்டு கோடையின் பிற்பகுதியில் செவ்வாயை அடையும் என AP குறிப்பிட்டுள்ளது. பிரான்ஸ்–ஜெர்மனி இணைந்து உருவாக்கிய 'இடெஃபிக்ஸ்' என்ற ரோவர், செவ்வாயின் இரு நிலவுகளில் பெரியதான போபோஸில் 100 நாட்கள் ஆய்வு செய்யும்.
Reach our readers. Contact us to advertise in this space.
2028 இறுதி அல்லது 2029இல் லேண்டர் போபோஸில் தரையிறங்கி, குறைந்தது 10 கிராம் மண் மாதிரியைச் சேகரிக்கும். இந்த மாதிரிகள் 2031இல் ஆஸ்திரேலியப் பாலைவனத்தில் வந்திறங்கும் என எதிர்பார்க்கப்படுகிறது. செவ்வாயின் மற்றொரு நிலவான டீமோஸையும் விண்கலம் கடந்து சென்று ஆய்வு செய்யும்.
இதுவரை எந்த விண்கலமும் போபோஸையோ டீமோஸையோ அடைந்ததில்லை; செவ்வாய் அல்லது அதன் நிலவுகளிலிருந்து மாதிரிகளும் கொண்டுவரப்பட்டதில்லை என்று AP குறிப்பிட்டுள்ளது. இத்திட்டத்துக்கு ஜப்பான் 350 மில்லியன் டாலரும், நாசா 87 மில்லியன் டாலரும் வழங்குகின்றன; மீதியை பிரான்ஸ், ஜெர்மனி மற்றும் ஐரோப்பிய விண்வெளி நிறுவனங்கள் ஏற்கின்றன.
